Nukakuluga Inuujunniirmat

“Ilinniarniq piqqusituqattinnik uvanik ikajuqsimajuq ilakkaniglu, nunakuluga inuujinniilauqtillugu.”

Nukakuluga inuujuniiqtillugu, uvagut ilagiiktugut sukkuttuinaukasalauqtugut. Suurlu, anirniirutilauqtugut – taimaaqai kisiani uqausirinajaqtara.

Quviasunngittuinaulauratta qangalimaaq. Quviasukaluaraangamaluuniit, piqatiga mitaluktilugu, uvannik piuksarunniiqatalauqtunga. Ningaumalualauqtungattauq nukaranut ingminiiqsimaninganut. Sikituukuuqsuni, qanuiligamikiaq, qijuksaalungnut apulaurmat, piksiksunilu. 18-nik ukiuqalaurmat uvanga 16-ngulunga.

Isumalauqtunga tamattinnik qimaituinarninganik, tukiqqanginnirminut. Ammalu saimajuniirutigilirmilugu, isumagaangami qanuq ningagvigijunnarmangakku angajuqqaakka quviasungiluaqtillugit. Taimailingainatuinaliluaqtunga.

Aippirmi nalliutingmat arragumi, kinguniqanaarumajunniilauqtara. Ullaapaaluutilugu iqqumarama pisugialilauqtunga silami nirjaqturviusuumi tasirmi. Angut tauvani ingminiilauqsimangmijuq qimissuni. Isumalauqtunga tasiq kinguliqpaangulugu takusimajumallugu.

Nunaqqativut silamiilaurmat, uvannut uqqallalirami, qaujijuviniq taimaitianginniranik. Uvanut uqqalainaqsuni, uqqalainnaqsuni, iqumaqsilauqtuq annanakkukanik. Uqautijungitaraluakka, qaujilauqtut qanukiaq. Quaqsaaqsimajuinnaulauqtugut, tammanalu uijjutigililauqtavut suurlu iqqumarutigillugu.

Piqqusituqakut mamisarialilauqtugut; Ataatagalu, asinglu angutiit ilagillugit. Uqausiriluajjaangitakka uvatinuinaq atajariaqarmat. Annanagattauq tuksiaqpaktuq uutaqtitiluni nunajamik ammalu nunamiutanik, mamarunniirutausuungugaluaq, qanuigingitara, anaanaujaarniqsaulirmat.

Qaujimalualaungikkaluaqtunga pigialaunginnittinni kisiani quvianaqtuq. Uqqaqatigiigunnaqsikkanniqtugut. Qaujimaliqtunga takulaarmigakku nukara kisiani maanaungikalauqtuq.